ম’চিগোন গুড়ো আমলর কধা

চালি-০১। 

 

ম’জীংহানির চিগন কালর কধা হেঙরী কত্তুনধুরি ক’ধুরিম ন’বুজঙর। তুও যেক্কেত্তুন ধুরি ঈধোতগুরি পারং সেক্কেত্তুন ধুরি এক্কা এক্কা কবার ধারজ উয়ে। এক্কে যেক্কে চের-পাজ বজজ্জ্যা গুড়ো ইলুং সেক্কে আমি আদামর গুড়োঝাক মিলিনেই গুলি খারা, বাদামবিজি খারা, এক্কাউক্ক নাধেং খারা, কলাবুল্ল্যালোই বন্দুক বানেনেই আর্মি-শান্নিবায়িনি খারা অহধং বিলি মনত আঘে। ঘিলে খারা আমা আমলত সেদক ন এলহ। নাধেং আর ঘিলে খারা শুন্নং বাবা আর আজুদাগি আমলত নাহি বেশ অহদাক। আমল বিদিজানাই আমা আমলত সিয়ানি কম অহদং। তবে গুদু খারা, পুত্তি খারা, কবাজাং, বেলেই খারা, রাজা খারা, ফোর খারা, পল্লাপুল্লি খারা, পেইক খারা, চারভাঙা খারা, দাংগুলি খারা, এক্কাউক্ক নুওবো নুওজামে খারাও উয়েই।

এবহ চোগত ভাজে সে অডং চিগোনহাল।

কদক্কানি অক্তমুজিম খারাও এলহ জিয়ানি অহক্ত মুজিম অহলে তে গম লাগিদ’। যেন রোনবাজি ফুদানা খারা আ বাদাবিজি খারা সমুত্তো নানাং বাবত্যা খারা। সিয়ানি বিঝু লক্কে অহদং। বিঝু বিদি গেলে সিয়ানি আর সেদক্কে গম ন’লাগে। সেক্কে রোনবাজিগুন কবোগত গুজেনেই মুজুঙে বজরত্তেই তুলি থদং। জেরেদি বিঝুবোত সিগুন নিগিলেনেই আর’ ফুদেদং। আর বাদামবিজি খারা বাদাম ফগনা অক্ত এলে তে ওই পাত্তং। আমি ধেবা পানিত্তুন দুরত এলং কিনেই পানিত খেলিবার খারানি তেমন ন’খেলিদং। তবে মাঝে মত্তে নানুদাগিদু বেড়া গেলে সিদু চেঙে পানিত কুমোর খারা, পানিহুরি খারা উদুঙ্গই। মর এবহ ঈধত আগে কুমোর খারা নানুদাগি সিদু অহবাত্তেই যেনেই মুই কয়েকপল্লা পানিত দুবি মরঙগরলোই। কারন
মুই সেক্কে সাজুরি ন’জানিদুং। কলাগাজ আজাগুরি ধুরিনেই চেঙে পানিত সাজুত্তং সেক্কে। দিন্ন এলে হুদু লেগাপরা, সেক্কে আমার বানা বেরানা। গুরু চরান্ন্যা লগে লগে কধক গুচ্ছং, ঈদি পাত্তং, বেঙ কুচ্ছং এলত্তুন কধক, ছড়া ইজিদং, আদাছুলি পাদিনেই দ’ কধক মারাঙা, শিঙিরে, পেঁজা, উগুরিকবাগ, ধুচ্ছেই। তবে একবারও মুই ধবাশিল, এইদদাগা বা পেঁজা ন’পাং আদাছুলি পাদিনেই। তবে উগুরিকবাগ, মারাঙা বুহুতবার পেয়োং । ঈদি পাদিনেই ঝারবো কুরো, নাক্কোন, মুরকুরো, আহত্ত্যা রাধা, আহরিকুরো কিচ্ছু বাজেই ন’পারং। জেরেদি ডাঙর অহদে অহদে জাঙেলছরা বানানা, কাবুক পাদানা, কেরাব পাদানা লারে লারে শিক্কং। বেগত্তুন বেশ জিয়ান নিত্য আহদত থেদঅ সিয়ান অলদে কান্টা। বাদল মুই বানেইও ন’জানিদুং মারিও ন’জান্দুং। কান্টালই বুহুত পেইক মারি মারি খিয়ং। এককধায় মুই চিগোন থাক্কে ইক্ক যদোপদে কান্টা পল্লান ইলুং। পুল্লে পুল্লে ফুলসুজোনি, কলাসুজোনি, সুদত্তুপি সমুত্তো চিগোন চিগোন পেইগো-ছ’ মাজ্জ্যা পল্লান ইলুং। জারকাল্যা সুমিসাগর গিলত তলে, থুর নিগিল্যা কলাগাজর আন্দলে কধক ঘন্টাতিয়ে বাচ্ছে রুয়ং চিগোন পেইগর রাজপল্লান সাজিনেই। জেরেদি লারে লারে জুড়বো পেইক, চনা, চত্তাপেইক, ভিরেইজ, উগুরিকবাগ, অহগলক, নাদেংগুত্তি, মনা, তদেক, কানি বগা, খরল্ল্যা, মহ’পেইক, থাগুর পেইক, বুরি পেইক, ক’, খঞ্জন মাত্তে মাত্তে কেতকেত্ত্যাও মাজ্জ্যাং। এই কান্টা মারিবার যে গুলি লাগন সিগুন বানেদং দোল দোল আ আহদা আহদা নিগুছ মুজুনো মাদিলোই। সে মুজুনো মাদি খজা জেদং ভালুদ্দুর ভালুদ্দুর পদ আহদিনেই। কারন সেদক্কে মুজুনো মাদিলোই বানেয়ে গুলি যদোবদে দরো অহদাক। মাঝে মত্তে সে মাদিলোই বানেয়ে গুলিগুন আরো পুরিদং। পুরিলে আরও বেশ দরো অহদাক সেত্তেই। ইয়ানি বাদেও দিন্নো এলে ভুলং অক্কতত ভুলং ভাঙা জেদং, পিত্তুংগুলো খা, সোরবেইগ গুলো তগা, জগনা গুলো, ইমিলিগবিজি, কুজুমগুলো, গোঙগোত্তে সুমুত্তো নানা বাবত্ত্যা খেবার জিনিস থোগে খেবাত্তাই ঝারে ঝারে বেরেদং। সেক্কে আমার কধু এল’ লেগা মাদানা, কধু এল’ পেরাবিত পরানা, ইক্কুলত জানা!! মামাদাগি ইক্কুলত পাদেলে আমি বেরে বেরে থেদংগোই এনজানগুরি। বারিজে লক্কে দেবা ঝর দিলে ভুইয়ানিত পানি ঢুবঢুবি অহদ’। সে ঢুবঢুবিয়ানিত আমি দিন্নো সাজুত্তঙ্গই। গোদা কিয়ানত কাজর পেঘর ছর বাজেনেই ঢুপগুরি বিল্ল্যা এদঙ্গই। কামোহুন্দো দিন এলে মামাদাগি কধাক “ইক্কুলত ন’জিও আর। মাস্তরুনোরে বন্ধ দি ইচ্ছো। কামে টাঙরা ন’যার ইন্দি। গুত্তেবোরে মানুষ বানেবার অক্ত উয়ে”। মাস্তরুনোরে লাগত পেলে আমা মা-বাপ্পুনে কধাক “মাস্তরবাবু ম’ছবো ইমেল্লে ইক্কুলত এই পাত্ত নয়। কুন্দোবো ফুরেলে তে এবাক্কে”। আমা মাস্তরুনো মনে অয় খুজি অদাক। 

(চালি থুম ন’অয়………)