বানেবার সিদুং জীবনর সুগ-দুগর সমারী।
কই ন’বারং তরে মুই গদা জনমান
তরে দেলে ভুলি যিদুং মন-কধাগান।
নিত্য রাগেদুং মনে মনে কধাগানি চুপগরি
কবার চেদ’ তুও ম’মনান উলত-পালত গুরি।
কধক চিয়ং তরে কবার কজুলি গুরি
বেগত্তুন বেশ কোচপাং তরে গদা জনমভরি।
কই নপাল্লেও তরে মুই মনে মনে কোচপিদুং
সেনত্তেই বিলি পদে পদে নিত্য বাধা পিদুং।
হরান উদুং মাঝে মত্ত্যে সেনক্ক্য বাধা পেলে
হাঝি ফিরি এদহ্ আর যদি তরে দেলে।
কধা কধে যেক্কে মল্লই দোলে হাঝি-মাদি
সেই নবাত্তুং লাজে তরে সেক্কে চোগদি।
পুজোর গত্তে তরে মুই ইদিক্কি বেশ লাজাং
তরে দেগিলে কধা ন’হোনেই কিত্তাই মু’ফেরাং।
আজল কধা কই নপারি চুপ গরিনেই থিদুং
নয়দে দোক্কে গুরি আর’ অন্য কধা কুধুং।
কিদক্ক্য ইয়ান বজং মর এব’ কই নপারং
সেই কধানি ভাবি সেত্তাই এজ’ পত্তা ধরং।
হয়ত আর’ কোচপেদেং তুই জুরো গুরিনেই
কই নপাত্তে মরেও তুই সুযোগ নপেনেই।
সেই সময়ান ইক্কুনু নেই দূরত আগছ তুই
ভাবি ভাবি সেই কধানি দুগ ভুজঙর মুই।
কন হেনত যদি তরে লাগত মুই পেদুং
উলত-পালত মনর কধা দোলে শুনেদুং।
এই কধানি ভাবি তরে দেগং এব’ স্ববনে
কোচপেয়ং কিনেই তরে বানা মনে মনে।
No comments:
Post a Comment