আমা হিলচাদিগাং

আমা হিলচাদিগাং

যিদু আগন আমা ইত্তো-কধুম, বাপ-ভেই আমা গিদি-গুত্তি

যেই জাগানত বাঝি আঘে আমা চিঙর-বাঙর

যেই জাগার পানি, ফুল, গুল’-গুলি খেই

তুগ ন’পোজ্জ্যা বলপেইয়্যা গুরি বাঝি আগি

ইয়ান সেই হিলচাদিগাং

আমা বেগর আওজর কোচপেইয়্যা জাগা

যেই জাগাগান আমি স্বর্গত্তুন বেজ তবনা গড়ি

যেই জাগানর বারেদি আমার চিত ন’জুরাই

উম ন’বজে কোনহিত্ত্যা যে জাগা বাদে আমার

ইয়ান সেই হিলচাদিগাং

যেই জাগানে আমারে মারবুগদক্ক্যা গড়ি রাগেয়ে

পরান সুঞ্জুক নিজেচ টানি পারি যে জাগানত

রেঙে-গীদে জিংকানি গঙে দিপারি

বেড়ে পারি যে জাগাত সঙ সঙ গুরি

ইয়ান সেই হিলচাদিগাং

যে জাগানর কধা কধে বেগে গড়ন মাধা উজু

যে জাগানত্তেই আমি আহজি আহজি জিংকানি দিপারি

যে জাগানর মানুজশুন উজু মনে চলন

ইংসে, পিজুম, রেজা-রেচ্চ্যা নেই যে জাগাত

ইয়ান সেই হিলচাদিগাং।।

আমা বেগর আওজর কোচপিয়ে জাগা

আমা বাঃ, আমা ঢালা, আমা বেগর বাম

স্বর্গ, মত্য পাদাল কনা আর হি হি নাঙ?

ন’লাগিবো কোনহিচ্ছু হারন আমার আগে

হিলচাদিগাং।।

Read more ...

বীর ভেইবোনুন

(সংগ্রামী জুম্ম ভেইয়র পয়দেনে দিলুং)

আরেয়েই জুম্ম ভেই কধক আওজর
হাবা-হাবি মারা-মারি অনেই নান্যাচর।
বরকল, কাউখালী, মারিশ্যা আর লোগাং
যে বীর ভেই-বোনুন শহীদ উয়ন, সিগুন এজ দেগং পারাপাং ।
যারা রুয়ন জুম্ম জাত্তরে বাঘ দক্ক্যান ঘিরি
আওজ গল্লেও সেই ভেই-বোনুন নপেবং আর ফিরি।
জিগুনত দ্বারাই চুর-ডাগিত লুগি রুয়ন ওজলেঙ্গোত
সেই চুর-ডাগিদরে হেমা নদোন তারা যেক্কে পিয়ন মোজঙত।
যিগুণ অন্যায় হামানরে ন্যয়ত ফিরি আন্যন
সিগুন জাদর নেতা ইজেবে গদাবেগে মান্যন।
সেই ভেইয়ুন ইক্কুনু নেই কন্না গরিবো হেলা
যুগল-অ ঝাদি ভেইলক এবার আমার পালা।
জধা অনেই বেগে আমি মোজঙ্গেন্দি যেই
সেই ভেয়ুনর রক্ত দাম ফিরি পেবাত্তেই।
বাধা-বিপত্তিত ন’থামেই এজ এগামনে
আত্ত্যার ধর, বেরেক বানঅ পুত্তি জনে জনে।
মনত তুলো বিদি জিয়া রাঙা -কালা দিন
যেক্কে উয়ে দরে হিয়া শিরপানির ঈন।
ঝাদি যুগল-অ রনহাবিনেই যুদ্ধত যেবাত্তেই
ভেইয়ুনর পদে আমিও যেবং স্বাধীনতা পেবাত্তেই।

Read more ...

বিদেয়র কধা

যেক্কে ন’থেইম তোমা ইদু            ফিরি যেইম আগর সিদু

                       চিত্ ন’বুচ্ছ্যা পদধি।

বারিঝ্যা দেবার ঝড়দক              চোগ পানি এহব কধক

                       দাগিলে ন’শুনিম কানধি।।

আমক গরি চেই থেবা সেক্কে        দুরত্ যেইম মুই দেক্কে দেক্কে

                       মরে রিপ্ রিপ্ দিগিবা।

শেষ নেইয়ে পদধি আহধিম         চোগ পানিলোই যেক্কে গাধিম

                       ফারগ অহলুং সেক্কে জানিবা।।

সময়র তালে আহধি যেইম          কবার কধা সুগ ন’পেইম

                       থেই ন’পারিম কারর আজায়।

বেগ দিগিম খাক্কুঞ্যা                 বিঞ্যান দিগিম সাজুঞ্যা

                       জানেম তোমারে বিদেয়।।।

ভুলি যি-অ পুরোন কধা              শুরু গুচ্ছ নু-অ পাদা

                       ফারগ অনার সময়ত।

ফুদেই তুল্লো নুঅ জীংকানি           রাঙা দিনুন ফিরি আনি

                      বোই ন’থেই ওজোলেঙত্।।

দোল আজা বুগত লনেই             বেগে যি-অ মুজুঙে উজেই

                      মনরে শক্ত গুরি।

জাদর কাম গরি যি-অ               চিগন ভেই-বোন রিনি সি-অ

                      ন’থিয় ঘুমত পুড়ি।।

জাগেই তুল্লো মন আজানি           ভুলি নযেই এই কধানি

                      মরে জানি মনত থায়।

খুজি ওম মুই সেক্কে                  এই কধানি পালেবা যেক্কে

                      মনে কহব এবার থোমা কায়।।

থেবার সেলেও থেই ন’পেইম        সময় যেক্কে লাগত পেইম

                     যা পরিব খামাক্কায় গড়ি।

নু’অ দিনুন ন’দিগিম                 সেক্কে দুরত আহধা ধরিম

                    শেষ নেইয়া পথ ধরি।।

ন’ এত্তে সে সময়ানি                দেগঙর মুই বেক্কানি

                    আগে ধরি বিদেয় লঙর।

এহধক বজর এক সমারে           কাদেই দির গিদে রেঙে

                    থেলে ভুল ক্ষেমা চাঙর।।

Read more ...

পুনংচান

আগাজত্ পুনংচান কমলে উদিব

ঘুরঘুচ্ছ্যা কালা আন্ধার কমলে কাজেব।

শুনাজার ভুগনি গিরগিচ্ছ্যার কানুনি

কোন কিচ্ছু চুয়ত ন’লাগে বেগ আনুনি।

তলেদি ডাঙর জিনিশ উগুরে চিগন

কিচমিচ হ্ই যার দরে মোনপোগন।

মাঝে-মত্ত্যা পহর গরি চেরাক জ্বলন

থুত্ত্যার বুয়েরে বেগ লন্দভন্দ অহন।

কোন দেলে কোন কিত্ত্যাত জ্বলি নবাত্তন

লাগা দি’ইক্ক জ্বলিলেও ঝাদি মরি যাদন।

বাচ্ছে থেবং আর’ কয়দিন পুনংচানরে

নবারির রাগে আর থলবল্ল্যা মনরে।

অসিজির এই সময়ান আর’ থেব কধক

লুমিবগি কমলে ইদু পুনংচানর ছদক।

কাররে কিয়ে ন’দেগদন আন্ধারত্ আগন

কালা-রাঙায় জাগানি ভরেই ফেলাদন।

কিছু কিছু বাপ-ভেইয়ে চেনা-চেনি ন’অদন

নিজর ফেজা ন’দিগি পরর ফেজা দেগদন।

দোলে ইক্কুনু থেবাত্তাই গেবং কার গান

কধু আগচ্ কমলে এহবে হাওজোর পুনংচান।

এহবে যেক্কে তুই ইদু পহর গরি আগাজ্চান

আন্ধার কাজেই দোল অহব সেক্কে আমা এ দেশ্চান।

Read more ...

মন-রিবেঙর কোচপানা

মনে মনে কোচপিদুং তরে নাগরী

বানেবার সিদুং জীবনর সুগ-দুগর সমারী।

কই ন’বারং তরে মুই গদা জনমান

তরে দেলে ভুলি যিদুং মন-কধাগান।

নিত্য রাগেদুং মনে মনে কধাগানি চুপগরি

কবার চেদ’ তুও ম’মনান উলত-পালত গুরি।

কধক চিয়ং তরে কবার কজুলি গুরি

বেগত্তুন বেশ কোচপাং তরে গদা জনমভরি।

কই নপাল্লেও তরে মুই মনে মনে কোচপিদুং

সেনত্তেই বিলি পদে পদে নিত্য বাধা পিদুং।

হরান উদুং মাঝে মত্ত্যে সেনক্ক্য বাধা পেলে

হাঝি ফিরি এদহ্ আর যদি তরে দেলে।

কধা কধে যেক্কে মল্লই দোলে হাঝি-মাদি

সেই নবাত্তুং লাজে তরে সেক্কে চোগদি।

পুজোর গত্তে তরে মুই ইদিক্কি বেশ লাজাং

তরে দেগিলে কধা ন’হোনেই কিত্তাই মু’ফেরাং।

আজল কধা কই নপারি চুপ গরিনেই থিদুং

নয়দে দোক্কে গুরি আর’ অন্য কধা কুধুং।

কিদক্ক্য ইয়ান বজং মর এব’ কই নপারং

সেই কধানি ভাবি সেত্তাই এজ’ পত্তা ধরং।

হয়ত আর’ কোচপেদেং তুই জুরো গুরিনেই

কই নপাত্তে মরেও তুই সুযোগ নপেনেই।

সেই সময়ান ইক্কুনু নেই দূরত আগছ তুই

ভাবি ভাবি সেই কধানি দুগ ভুজঙর মুই।

কন হেনত যদি তরে লাগত মুই পেদুং

উলত-পালত মনর কধা দোলে শুনেদুং।

এই কধানি ভাবি তরে দেগং এব’ স্ববনে

কোচপেয়ং কিনেই তরে বানা মনে মনে।

Read more ...