বিঝুর ভজনা

বিজু লোক্কে ফুল দেদন মা গঙ্গিরে।

জনমর সুদোমে পিত্তিমির সুদোমে ফিরি এচ্ছে বিঝু 

এই বিঝু উপলক্ষ্যে সচ্ সচ্ গোজেন 
গাদিবুর পারিনে ফুলেপাগোরে ত সিদু ভজনা গরং 
মানেলগর আ বেগ পরানবলার আবদবলা ফিবলা কাধি যোগ লামি যোগ ছড়ানালো ছান গুরি 
বেগর আজা পূরণ ওক সোনার চিজি ন হানোক 
জুম্ম বেবে ধেই ন যোক বেজাদর লগে 
থুম ওক ভেইয়ো ভেইয়ো কজ্জে, জাদর চিদেই জাগি থাদোত জুম্ম গাবুজ্জে 
টিগি থোক জাদর রিদিসুদোম জনম জনম 
ফাগাবেই পোরোক হিরিমিরি আহজি বেগ জুম্ম মুওত্তুন 
সুদিন সুমাদান ফিরি এযোগ, যাই যুক্কোলে থিদব্বরে ঘরগিরিত্তি ভরি যোগ 
সোনায় রুবোই হপ ভরোক নাদিনে পুদিনে ঘর ভরোক 
দেলে শত্তুরে দরাদোক, বেঙাপদে আহত্তেগুন ফিরোদোক 
আমা জাগা আমা দেজ আমা জাত বেগ টিগি থোক কাঙেল উজুগুরি 
গদা জুম্মোগুন জাদর ভাজে মাদোদোগ অন্য ভাজ ফেলাদোগ 
জলি উদোক জাদর বাত্তি জাদর লুরো ডুনুম ডুনুম 
মোজোঙেদি আক্কোদোক জাদর পো'ছাবাগুন 
পহর গত্তোক জদরে আ গদা পিত্তিমিয়ান 
রেঙ দি উদোক জাদর আহাদানার তুবোল 
পিত্তিমির হাজায় হাজায় ছিদি পোরোক জাদর তুমবাজ 
আমা মুরোল্যা চাদিগাঙত গদা পহর ফুদোক ।